منتدي الرعب والجن والعفاريت رعب وعفاريت خوف جان عفريت السحر العين ،الحسد رعب بلا حدود وتذكر ان كوابيسك ستتحول الى حقيقة . فن الرعب.اغاني ايمو اغاني ميتال

خبرات مرعبة (قصة حقيقية مسلسلة)

قائمة الاعضاء المشار إليهم :

إضافة رد
عوده السفاح
24 خبرات مرعبة (قصة حقيقية مسلسلة)

السلام عليكم و رحمة الله

القصة التى سأرويها عليكم حقيقية


الحلقة الاولى
كنت نائما فى فترة الظهيرة عندما ايقظتنى والدتى و قالت لى: ياللا بينا نسلم على ابن خالك محمد جه من مصر.
وددت لو اقوم معها و لكننى كنت قد سهرت طوال الليل و احتاج الى النوم بشدة فلم استطع و قلت لها: اسبقونى انتوا و انا اول ما اقوم من النوم هاجيلكم على طول.
طبعا حاولت باستماتة و لكنى تمسكت بالسرير المريح, ففقدت الامل و ذهبت هى و اخى الاصغر الى منزل جدتى لتسلم على ابن اخيها بينما استمعت انا بنوم لذيذ هادئ البال لا اعلم ما ينتظرنى فى أخر اليوم.
لابد لكل شئ من نهاية... و أخيرا انتهى النوم الجميل فقمت فى تكاسل و ارتديت ملابسى و توجهت فورا لمنزل جدتى و كلى شوق لأرى ابن خالى و لم اكن رأيته منذ فترة طويلة. و ابن خالى هذا يكبرنى بعام واحد و كنا دوما عند حضوره الى البلد نتناقش مناقشات ممتعة و خصوصا انه كان ذو عقلية متفتحة بل و متحررة جدا و لكننى عندما وصلت الى منزل جدتى وجدت شخصا أخر تماما.
فماذا وجدت؟
و ما الذى غير محمد (ابن خالى) الى النقيض؟
و ما هى الاحداث المرعبة التى رأيتها بعينى؟
سنعرف هذا فى الحلقة القادمة



الجزء الثانى
ما أن دخلت الى منزل جدتى حتى وجدت العائلة مجتمعة كالعادة ترحب بالضيف كالعادة و لكنى احسست بوجههم غريبة كأن شيئا ما قد حدث, منهم من هو منتبه و منهم من هو خائف و منهم من يضحك كأنه شاهد مسرحية هزلية, لم اهتم كثيرا و ذهبت اليه لاسلم عليه و وجدت شيئا غريبا.
وجدته يجلس فى هدوء و سكينة و ممسكا سبحة فى يده, طبعا انا عمرى ما شفته عامل كده, و هو كما قلت لكم شخصية متحررة, فهو كان لا يواظب على الصلاة, فما بالى اراه فى صورة شيخ وقور.
نظرت اليه قائلا بتهكم: سبحان مغير الاحوال.
فنظر الى و هز رأسه قائلا: هه سبحان من يغير و لا يتغير.
فقلت فى سرى: اكيد فيه سر وراء حبة المشيخة اللى راسمهم دول, و أنا مش سايبه الا لما اعرف ايه حكايته.
و لكنه لم يمهلنى و وقف مرحبا بخالتى (عمته فى نفس الوقت) و التى دخلت الغرفة و قال لها: هل خلعتى كل الاشياء المعدنية من خواتم و ساعة, و توضات؟
فأومأت ان نعم.
فقال: نبدأ على بركة الله, توجهى الى القبلة و غمضى عينك و اقرى الفاتحة.
لم افهم شيئا و لكنى أثرت ان اشاهد للنهاية.
و بدأ يقرأ الرقية الشرعية و يرفع صوته مخاطبا شيئا غير مرئى و أنا اكاد انفجر ضاحكا و لكنى وجدت الموقف لا يحتمل فصمتت على ان انفرد به لاحقا لانهاه عن هذا الاستهبال الذى يفعله.
ثم أمر فجأة الشئ امر غريب فقال: ان كان مس هات الجسم يمين, و ان كان حسد هاته شمال, و ان كان سحر هاته ورا.
ففوجئت برأس خالتى تسحب للوراء بشدة و كأن أحدا يجذبها.
و استمر محمد يتكلم: ان كان الجن مسلم يمين و ان كان مسيحى شمال و كافر او مجوسى لورا.
و فى هذه المرة ايضا سحبت رأسها للوراء بنفس الطريقة.
و أمر الجن بعده برفع يدها اليمين الى اعلى فارتفعت ببطء شديد و كأنها يد عروسة من عرايس الماريونيت معلقة بحبل, و أخذ يخاطب الجن و يرفع صوته مهددا و ينذر و يتوعد و يقرأ ايات و لكنه لم يستطع ان يخرجه فى هذه المرة.
تأملت افعاله فوجدتها كلها تدخل تحت بند الإيحاء فعندما تغمض عينيك و تقف فلابد ان تميل الى جانب من الجوانب اما اليمين او الشمال او الخلف و حكاية اليد هذه ببعض الايحاء ممكن ان ترتفع بايهام الضحية بان احدا يرفعها خصوصا لو ان الضحية مهيأة لاستقبال الايحاء.
استقر ذلك تماما فى نفسى و عزمت على مصارحته بهذا و ان انصحه الا يفعل هذه الخدع و الحيل مرة اخرى مستغلا عقول البسطاء و لكن....
كيف و لماذا تغير ابن خالى؟
و كيف اكتسب هذه المقدرة؟
و هل هى مقدرة خاصة؟؟
هذا ما سنعرفه فى الحلقة القادمة بإذن الله

فقررت ان افعل ذلك بطريقة عملية. فقمت و قلت له بتهكم: ما تشوف كده فيه عفاريت عليا و لا لأ؟؟
فقال لى: توضأ
فقلت: متوضى.
فقال لى: بص على القبلة و غمض عينك و اقرا الفاتحة
و بدأ فى القراءة و انا افكر... فى الايحاء لابد من ان يكون الضحية مقتنعا بالفكرة و متقبل للخدعة لكى تملك جسمه و تحركه بالايحاء اما فى حالتى فمستحيل ان يستطيع ان يفعل معى شيئا.
و فعلا صدق ظنى و لم يستطع ان يحرك منى شعرة واحدة و قرأ حتى تعب و لما فقد الامل اخذ يأمرنى بالسجود قائلا: الجسد اذا ما كانش فيه جن يسجد. فلم اسجد طبعا و انتهى به الامر الى وضع مزرى و بدأ يفقد كل ما اكتسبه من هيبة و قال لى بعد ان رش على وجهى ماء افتح عينيك.
نظرت اليه بتحد و قلت له: هه لقيت عليا جن و لا مالقيتش؟؟
فطأطأ رأسه و قال لى: معرفش... الى حصل ده غريب جدا, لو كان عليك جن كان المفروض انك تحرك ايدك و لو كان ما عليكش جن كان المفروض انك تسجد. و الاتنين محصلوش.
ضحكت و قلتله: طيب و العمل؟؟
قال انا لازم اتصل بشيخى و اعرف منه ايه الموضوع.
و ذهب يتصل بشيخه و بدأت انا اشرح للموجودين نظرية الايحاء و كيف انه ممكن لشخص ذكى استغلال الشخصيات المحدودة الذكاء فى عمل تصرفات معينة و ايهامهم بان له قدرات معينة و لكن بشرط ان تقتنع الضحية بقوة الهذا الشخص و لهذا لم يفلح محمد فى ان يفعل معى شيئا لانى غير مقتنع بالفكرة من اصله.
قاطعنى محمد بدخوله الى الغرفة ممسكا ورقة و قلم و قال لى: اكتب اسمك ثلاثى و اكتب تاريخ ميلادك و اكتب... و ذكر اشياء لا اذكرها الان و فعلت ما قال لى ثم نظر الى الورقة و انتفض فجأة و نظر الى بخوف فسألته بفزع: ماذا؟؟؟
قال لى: لا شئ ... لا شئ.
فقلت له: اجلس يا محمد انت واهم و هذه الاشياء لا علاقة لها بالجن و لكنه نوع من الايحاء و الشيخ الذى علمك ذلك اما نصاب و اما مخدوع مثلك و انصحك الا تحاول ان تفعل ذلك مرة اخرى و الا قد تؤذى نفسك.
فقال لى: بل انت الذى لا تعلم ماذا حدث لى.
فنظر له كل من بالغرفة و على وجوههم الاهتمام الشديد و قلت له: ماذا حدث لك؟؟!!
و بدأ محمد يحكى حكاية اغرب من الخيال.
فماذا قال محمد؟
و كيف تعلم هذه الاشياء؟؟
و هل ما فعله وهم ام حقيقة؟؟؟
كل هذا سنعرفه فى الحلقات القادمة
فتابعونا

بدأ محمد يحكى بعد ان اتخذ كل منا مكانه و كلنا شغف لمعرفة ما سيقول... و تكلم فذكر اشياء عجيبة, فقال: انت عارف يا حسام انى ماكنتش باصلى لا انا و لا محمود جوز اختى و كنا مش مقتنعين بموضوع العلاج بالقرأن و لا الجن و لا كل الكلام اللى انت شايفه دلوقت.
لكن فى يوم من الايام كان لنا صاحب بنحبه خالص اتجوز و لمدة سنة ماحصلش حمل لمراته فبدأ يروح لشيوخ فقالوا له انه مسحور, و احنا طبعا كنا بنقول له مافيش حاجة اسمها كده و بنبعده دايما عن السكة دى.
و فى يوم قال لنا: انا رايح للشيخ (سعد) فقلتله: مين سعد ده؟؟
قال: ده واحد بيقولوا عليه شاطر جدا, ما تيجوا معايا؟
ماكانش ورانا حاجة فقلنا نروح نتفرج, و كنت انا يا حسام عامل زى مانت عامل كده و رايح اثبت انه غلطان و نصاب و الحاجات دى. بس لما رحت له لقيت الامور غير كده خالص.
بدأ يقرا على صاحبى ده بالطريقة اللى انا باعملها دلوقت, و بعدين صاحبى مش باين عليه اى حاجة. فصرخ الشيخ فيه و قال: لو فيه جن يرفع الايد اليمين لفوق, و ابص الاقى يا حسام ايدى هى اللى اترفعت مش ايده هو!!
فصرخت و قلت للشيخ ايه اللى انت عملته ده؟؟!!
فقال لى الشيخ: اهدى الامور بسيطة.
قلت له: اهدى ازاى انت ازاى ترفع ايدى بكلامك بس؟ ازاى؟؟؟
قال: انا ما رفعتش ايدك ده الجن اللى جوه جسمك هو اللى اتحكم فى اعصاب جسمك و رفع ايدك.
فقلت له: طيب و الجن يسمع كلامك انت ليه؟؟
قال: انا مين علشان يسمع الجن كلامى؟ لا الموضوع مش كده. انا بقرأ القرأن و ادعى ربنا انه يمكننى من الجن فربنا بيستجيب و يخليه يسمع كلامى و لو ربنا ما استجابش لو قعدت قدامه سنه مش هيسمع كلامى.
قلت: ازاى؟
قال: انا معرفش بالظبط و ميهمنيش اعرف, بس فيه ناس بتقول انه فيه خدام من الملايكة للايات بتاعةالرقية لما تقراها بيجوا الخدام و يعذبوا الجن فيسمع كلامك.
فقلت: خزعبلات.
قال: لا ده كلام علماء و مش جايبينه من الهوا دول مستندين الى ما ورد عن اية الكرسى ان من قرأها عند النوم ارسل الله له ملكا و كان له حافظا وحاميا من الشيطان حتى يصبح.
فوجدت الكلام منطقياو الرجل لا يدعى علم مخصوص به و لا يتكلف ما لا يعلم.
ثم قال لى توضأ و قف و انظر الى القبلة.
و قرأ على فوجد على جنى مجوسى و جعله ينطق على لسانى.
و لكن شيئا غاية فى الغرابة حدث اثناء القراءة و جعلنى اتغير الى النقيض.
فما هو هذا الشئ؟؟
و مالذى سيحدث لمحمود زوج اخته؟؟
هذا ما سنعرفه فى الحلقات القادمة فتابعونا

و استمر محمد يحكى فقال: و كان محمود زوج اختى موجود و كان كما تعلمون لا يصلى و لكنه كان متكلما جريئا, فلما رأى الشيخ يجادل الجنى المجوسى و يكلمه عن الاسلام تدخل فى الحوار و حاول اقناع الجنى بالاسلام, فرد عليه الجنى متهكما: انت فاكر نفسك معاهم؟!! دانت معانا احنا.
و سقط كلامه كالصاعقة على رأس محمود بل وعلى رأسى ايضا فلم أكن مواظبا على الصلاة, و خرج محمود يبكى و هو غير مصدق لما قيل, فلقد سمعنا كثيرا من يقول تارك الصلاة كافر و لكننا كنا نطمئن انفسنا و نقول هؤلاء متشددون لا يعلمون حقيقة يسر الدين (اى اننا نحن الذين نفهم حقيقته و نحن لا نصلى اساسا) و من وقتها و محمود (و كذلك انا) مواظبين على الصلاة فى موعدها و تعلمنا الرقية لنساعد من استطعنا من اخواننا.
و فى هذه اللحظة تدخل اخى الاصغر معتز و كان مثلى لا يصدق فى هذه الامور, و قال لمحمد: شوف عليا عفاريت و لا لأ؟
فقام محمد بالخطوات نفسها و معتز يضحك و يسخر منه, لكن مع الفارق, لقد حضر الجن سريعا جدا و رفع يد معتز فخفضها معتز بقوة فارتفعت مرة اخرى فخفضها ثانية و ظلت هكذا اليد فى شد و جذب حتى اصاب معتز عرق شديد و جعل محمد الجن يتكلم على لسانه و كان جنيا نصرانيا اسمه جرجس و امره محمد بالخروج و القاء جسد معتز للأمام و هو خارج فخرج الجنى فورا و فوجئنا بمعتز ينكفى للأمام فجأة و يكاد يسقط لولا انى امسكت به قبل ان يسقط على الارض.
و معه سقطت نظريتى عن الايحاء.
فهو لم يكن مقتنعا بل كان يسخر من محمد.
و ايضا حاول ان ينزل يده فارتفعت وحدها.
و تكلم الجن على لسانه.
و عرق عرقا شديدا.
و هذا السقوط...
ان الامر غريب حقا.
و نظرت الى محمد بين مصدق و مكذب و قلت له: لابد ان تعلمنى الرقية.
فماذا كان رد محمد؟؟
و هل تعلمت منه الرقية؟؟
و ما هو المشروع الغريب الذى فكرنا فيه؟؟
كل هذا و اكثر فى الحلقات القامة
فتابعونا


نظر الى محمد نظرة مخيفة و قال: هو الموضوع فيه ثواب, لكن دى حاجة فى منتهى الخطورة لو دخلت فيها مش هتعرف تسيبها ابدا.
فقلت له ضاحكا: ليه بس هو حد هيجبرنى؟؟ و بعدين ايه الخطورة اللى فى الموضوع؟؟ انا شايف انها حاجة فى منتهى السهولة.
كم كنت متهورا, و كم عانيت بسبب تهورى
بعد مداولات و تمنع من محمد وافق اخيرا على تعليمى و لقد كان الامر سهلا جدا كما قلت, فحتى بدون ان يعلمنى كنت قد عرفت الايات التى يقرأها لتحضير الجن و التعامل معه.
لكن الصعوبة لم تكن أبدا فى التعليم, و لكنه كان فى العواقب... فلقد علمنى الرقية فى لحظات و استمر فترة يعلمنى كيف اتحصن من انتقام الجن, و قال أخيرا.. و كل هذا التحصين لا يمنع الجن من أذى من تحب إذا لم يتمكن منك.
و كان أهم ما علمنيه محمد هو أن الجن ضعيف و جبان و غبى و كذاب
ضعيف لا يحتمل الأيات القرأنية أو اى وسائل للرقية كالماء المقروء عليه و خلافه
جبان يخاف إذا نهرته و إذا كانت شخصيتك قوية خاف منك
غبى و قد يصدق أنك تراه اذا اوهمته بذلك
و كذاب فلا تسأله مثلا عن الذى قام بالسحر فساعتها سيحاول ان يجيب اجابة يعلم جيدا انها ترضى الضحية و لا يذكر الشخص الحقيقى.
هل كانت ثقة بإيمانى بالله؟؟
ام كان غرورا هو الذى دفعنى لاستهتر بالجن هكذا؟؟
لا أعلم و لكنى أعلم جيدا ان هذا كان خطأ و لا لزوم له على الاطلاق.
كل ما اذكره انى لم اكن (فى حياتى كلها) ارى احدهم قام بعمل ما الا و اقتنعت تماما انى يمكننى ان افعل مثله... و لم لا؟؟
يا لى من مغرور

عدت الى منزلى و تناقشنا كثيرا فى الموضوع و لم تغادر تفكيرى بعد نظرية الايحاء و ان لم تفسر لى كل شئ. و لكن مع الفارق, سأحاول انا ان استخدم هذا الايحاء و اقوم بتجارب واضحة لأعلم كل شئ عن هذا الموضوع و اعجبتنى الفكرة جدا و لم أكن اعلم عن الجن الا اشياء لا تذكر فبدأت أبحث عن الجن و معلومات عنه فوجدت اشياء عجيبة جدا جدا,
حقائق بين ايدينا و لكنها اذا رتبتها الترتيب الصحيح خرجت منها بنتائج مذهلة.
فما هى هذه الحقائق العجيبة؟؟
و ما هى نظريتى الخاصة عن الجن؟؟
كل هذا و أكثر سنعرفه فى الحلقات القادمة
فتابعونا


دخلت فى مرحلة من الإعتكاف لجمع المعلومات و بدأت بتفكير منظم أجمع ما هو راسخ فى تفكيرى عن الجن مما عرفته من القرآن و السنة لكى لا أحيد عن الحق و وضعت قاعدة لتحمينى
((فى الغيبيات لا شئ أكيد الا ما ورد عن طريق الدين))
فلن أخذ بشهادة شاهد أو رؤيا مخرف أو مدعى ولاية قد يكون صادقا او غير ذلك.
فنظمت هذه المعلومات
1- الجن مخلوق من نار (و النار تتكون من؟؟؟؟)
2- الجن يطير الى السماء الاولى و يغوص فى الماء و يتحرك بسرعة رهيبة
3- الجن يرانا و لا نراه
4- الجن يستطيع أذى ابن أدم و اشهر طرق الأذى الربط و المس و الصرع و الكره و الحب و سحر الأعين
5- يحترق الجن بشواظ من نار و نحاس
6- يتم السحر بفعل كفر من الساحر و فى المقابل يقوم الجن بفعل السحر المرغوب كجائزة له على ذلك
7- يشاع ان الجن ايام سليمان عليه السلام كان يحبس فى قمقم من نحاس مختوم بالرصاص (غير مؤكد)
8- يتشكل الجن فى صور حيوان او انسان واذا قتلت الشكل الذى تشكل به مات هو ايضا.
و نظمت المعلومات و بدأت فى البحث عن معلومات أخرى ربما تفيد و لكنى لم اجد معلومات اكيدة و لكنى سأورد ما توصلت اليه.
قرأت مقالا مترجما لأحد العلماء (و هو غير مسلم) درس ظاهرة (القوى الغير منظورة) و خرج بالنتيجة التالية, أن هناك قوى غير منظورة تستطيع السيطرة على الجسم البشرى عن طريق السيطرة على مراكز المخ, فهى اما تؤثر على مراكز الحركة و تصيب بالشلل او تؤثر على مركز النظر و تصيب بالعمى و من الممكن ان تقوم ببث بؤرة صرعية و تقوم بعمل تشنجات او تؤثر على المراكز الجنسية و تسبب الربط و هكذا.
و بدأت بعدها احاول اجيب عن السؤال الأول....
مم تتكون النار؟؟؟
و كان الجواب مفاجأة
فما هو الجواب الذى فتح لى ابواب كل شئ؟؟
اترك لكم الاجابة على هذا السؤال
و سانتظر قليلا لتعرفوه بانفسكم
لان الاجابة ستكون مفاجأة
مفاجأة بكل المقاييس



ظللت ابحث عن ماهية النار فترة و كنت متأكد ان ده مفتاح السر... ليه؟ علشان كنت عارف كويس ان
الانسان مخلوق من طين و كل مكونات الانسان موجودة فى الطين ( الماء و الحديد و الزنك و الكالسيوم و
اليود و ...) و بالتالى هيكون فهم النار مفتاح لفهم الجن و بصراحة تعبت جدا و مكنتش لاقى حد يفهم فى الموضوع و خصوصا ان ايامها ماكنش النت

انتشر و كانت المسائل لسه صعبة و بعدين الامور انفرجت شوية.
فى يوم من الايام قابلت واحد صاحبى دكتور و كنت باحكى معاه فى الموضوع و لقيته بيقول: انا عارف النار
بتتكون من ايه!!!
طبعا ذهلت لانى متوقعتش ابدا انه يكون عارف فحتى ما سألتهوش على الحكاية دى.
قال: انا كنت عاوز اعرف ايه النار دى بالظبط و دورت فى كذا مكان لحد ما لقيت واحد و سألته النار
بتتكون من ايه و عرفت.
انا: هه؟؟

(( النظرية))

و اول ما قالى اترصت كل النظرية قدام عينى و بقيت واضحة تماما و لقيت كل شئ منطقى و متسق لانه
قالى ان النار بتتكون من موجات... موجات كهرومغناطيسية.
لقيت حكاية الموجات دى تفسر كل شئ نعرفه عن الجن
1- الجن يطير و يغوص و بسرعات عالية (طبيعى لأنه موجات)
2- يرانا و لا نراه (برضه طبيعى هو حد فيكم شاف موجات)
3- يمكنه عبور الابواب و الحوائط.
4- لا يمر من الرصاص (القمقم) كالموجات تماما.
5- فى الحديث ان الجن بعد ان نأكل اللحم يكسو الله له العظم لحما أخر فيأكل منه (من المعروف ان كل جسم
له مجاله الكهرومغناطيسى و من الواضح انه يأكل المجال المغناطيسى حول العظم)
6- فسر موضوع المجال المغناطيسى كيفية أذاه للبشر. و هنا انا هاتكلم بالتفصيل شوية.
(( الاشارة تخرج من المخ اما حركية او حسية
الاشارة الحركية هى اشارة كهربائية تخرج من المخ الى العضلة عبر الاعصاب فتأمرها بالتحرك.
الاشارة الحسية هى اشارة كهربائة تنتقل من المستقبلات الحسية (الجلد, السمع , التذوق , البصر....) الى

المخ عبر الاعصاب فيدرك المخ الاحساس المنقول.
بعد هذه المقدمة ما على الجن الا ان ينقل اشارة كاذبة فى العصب فيفعل ما يريد فمثلا
1- اشارة فى العصب الحركى فيقوم بتحريك اليد مثلا الى اعلى.
2- اشارة فى العصب البصرى فترى امام عينك اشياء لا وجود لها.



خبرات مرعبة (قصة حقيقية مسلسلة)

فالضوء يقع على الشبكية و هى مستقبلات الضوء ثم يمر عبر العصب البصرى ثم الى مركز الابصار فى المخ فيرى ثم الى مركز الادراك فيهم ما رأى. فإذا مرر الجن اشارة مشابهة لاشارة وجه انسان راينا وجه انسان و لا يوجد احد.( و سحروا اعين الناس و استرهبوهم و جاءوا بسحر عظيم)

3- اشارة فى عصب السمع فتسمع اصوات لا يسمعها غيرك.
4- يمكنه ببساطة ان يقوم بالصرع و لقد سمعتم بالتأكيد عن البؤرة الصرعية بالمخ او اللى بيقولوا عليها (

كهربا زيادة) و اللى هى ببساطة شديدة ... الجن, خصوصا و ان طبيا 90% من حالات الصرع سببها غير
معروف.))
7- معروف ان الوضوء بيحمى من الجن و الحديث (الوضوء حصن المؤمن) و هو الوضوء و برضه السجود بينظم المجال المغناطيسى حول الجسم بطريقة بتمنع اختراقه.
8- لازم فى الرقية نخلع الخواتم و الادوات المعدنية لانها بتمنع خروج الجن و ده طبعا له علاقة بالموجات.

9- سحر الكره يؤثر فى مراكز الادراك فيجعلك ترى شكل من تحب مخيفا. و بالعكس سحر المحبة.


طبعا فرحت جدا بالنظرية و جريت على محمد و شرحتهاله و فهمها تماما و عجبته و قال: انت عارف؟ انت لو قدرت تعرف الجن بيتكون من ايه هتعرف تعمل جهاز يشوفه و لو عرفت تشوفه هتعرف تعمل مسدس يقتله.
يا ترى ازاى هنشوف الجن؟؟
و يا ترى التجربة هتكمل و نعمل المسدس؟؟
و لا الامور هتاخد مجرى تانى؟؟
كل ده و اكتر هنعرفه فى الحلقات الجاية


ذات صلة:


 
من مواضيعي في كريزي مان

  • لما تواصل لمرحلة اليأس فى الحب هاتعمل اية ؟؟؟؟؟
  • الحب من طرف واحد , كيف نتجاوز المشكلة ؟!
  • بالصور تما القبض على سفاح (منعا لاصحاب القلوب الضعيبفه )
  • مليارا مستخدم للإنترنت بنهاية 2010 21-10-2010
  • واحد رخم قوى بيفسح خطيبته ها ركزو على رخم دى
  • ليلى علوى تحصل على اجازة من فتاة الليل
  • هوائيات ذكية تركز الإشارات اللاسلكية.. اختراع أردني في مجال الاتصالات
  • فتاة رفضت شاب للزواج انظرو ا ماذا فعل ؟؟؟
  • سامسونج تسعى لتقديم جهاز لوحي مرن بشاشة شفافة
  • قصه حقيقه من على النت بس لواحد اسمه مشتعل
  • عوده السفاح
    افتراضي

    بدأنا نقلب الموضوع فى دماغنا على طول و اكتشفنا طريقة جميلة جدا جدا علشان نشوف بيها الجن و لكن .... و اه من لكن
    نبدأ الحكاية من الاول و هنكتشف مع بعض اللى حصل.

    اشهر حاجة بيعملها الجن هو الصرع. طبعا معلوم و زى ما قلتلكم قبل كده ان حالات الصرع طبيا 90% منها سببه مش معروف (جن يعنى) لكن بالرغم من كده بيتشخص... ازاى؟؟
    برسم المخ.
    رسم المخ بيبين ان فى حاجة اسمها بؤرة صرعية و دى بؤرة بتنبض كهربا و لو الانسان اتعرض لشحن البؤرة دى بأى مؤثر خارجى (صوت عالى او ضوء شديد) او حتى داخلى (ضيق او توتر) بتحصل النوبة و فيها بقى النبضات الكهربائية (الغير مفهومة) بتبعت اشارات عبر الاعصاب الحركية لعضلات الجسم كلها فبتتحرك بانقباض و انبساط عنيف لفترة محدودة (تشنج) لكل الجسم.
    و طبعا فهمتوا انا قصدى ايه.
    البؤرة دى هى الجن.
    و فضل اننا نعمل تجربة بسيطة لاثبات الكلام ده.
    1- نشوف حالة عندها صرع.
    2- نعملها رسم مخ.
    3- نطلع الجن منها.
    4- نعمل رسم مخ تانى (لو اختفت البؤرة الصرعية يبقى البؤرة هى الجن او على الاقل الجن هو اللى مسببها)

    يبقى اللى محتاجينه علشان التجربة
    1- حالة عندها صرع (طبعا هنحتاج اكتر من حالة)
    2- شخص ذو عقلية متفتحة و بيعرف يطلع جن (محمد طبعا)
    3- مكان نعمل فيه رسم مخ كذا مرة

    قعدنا نفكر انا و محمد نجمع العيانين ازاى و نعمل رسم المخ ازاى و فوجئنا بشخص ما كناش نتوقعه ابدا داخل علينا.
    شخص شفنا فيه الحل لكل المشكلات اللى بندور علينا.
    اختى.
    و اختى دى اكبر منى و بتشتغل مديرة مستشفى امراض عصبية و نفسية (شفتوا المفاجأة)
    طبعا اول ما شفناها انا و محمد فرحنا خالص و هى طبعا ما فهمتش سبب فرحتنا و استغربت و قعدت و هى مش فاهمة حاجة.
    فتحت الكلام انا و قلت: مش محمد بيعرف يعالج الجن بالقرآن.
    قالت: انتو بتصدقوا الكلام الفاضى ده؟
    قلتلها: لا ده فى ايه فى القرأن (فيه شفاء للناس)
    قالت: طبعا لكن مين اللى قالك ان الشفاء ده شفاء من الجن , و مين اللى خص محمد بالشفاء ده مش غيره. لا طبعا الشفاء لكل الناس و لكل الامراض لكن باذن الله.
    قلتلها: طيب ماهو طلع جن من معتز قدامنا و شفناه بعينا.
    قالت: ايحاء.
    قلتلها: ماينفعش يكون ايحاء اساسا.
    قالت: و انت ايش فهمك. انا هاريحك, رئيس القسم عندنا درس العلاج بالقرأن و اتعلمه و اتعلم يعالج الجن علشان يدرس الموضوع كويس و وصل فى الاخر لنتيجة واحدة.
    قلت: ايه هى؟؟
    قالت: ان كل الكلام ده نصب و كلام فارغ.
    طبعا محمد كان سامع الكلام ده و هو هيتشل.
    لكن انا مسكتش و راحت قايلها على المشروع, و لكن ....
    ايه بقى حكاية لكن دى؟
    و يا ترى هنعرف نقنعها بالتجربة؟
    و ايه قصة زميلتها مع الساحرة و الطفل العجوز؟
    كل ده و اكتر فى الحلقات الجاية

    نظرت الى اختى باستخفاف و قالت: انتو فاكرين انكم جبتو الديب من ديله؟
    احنا ياما شفنا من الكلام ده و كله ايحاء.
    طبعا انا الكلام معجبنيش و قلت: بس فى الايحاء لازم الضحية يكون انسان مش مثقف او ساذج و و يكون عنده استعداد للاقتناع.
    قالت: طيب طالما انت مش مقتنع انا هاحكيلك على حكايتين اغرب من بعض عن ايحاء حصل للدكتورة.... اثناء علاجها لمرضى نفسيين و لا هى ساذجة و لا هى مقتنعة.
    قلت بدون اهتمام: احكى. و لما بدأت تحكى قالتلى كلام غاية فى العجب و مكنتش اتخيله ابدا.
    في يوم من الايام (و الكلام لها) خرجت علينا الدكتورة .... و هى تبكى فسألناها ما الذى حدث؟؟ فقالت: كنت اعالج امرأة عجوز و بينما تحكى قصتها قالت فى معرض الكلام و لقد اشتغلت فى السحر فترة فرددت عليها قائلة بثقة: لا يوجد ما يسمى بالسحر. فنظرت الى نظرة مخيفة و قالت لى: لا تقولى ذلك يا بنتى... هذا خطر جدا عليك. و فوجئت بعيناها تكبر فى الحجم و تسيطر على نظرى تماما فنظرت بسرعة الى يمينى فوجدت عينيها ثم نظرت الى يسارى فوجدت عينيها و احسست انها تحاصرنى بنظرتها فى كل مكان فما كان منى الا ان اغمضت عينى كى لا اراها فرايتها ايضا و عينى مغلقة فخرجت اجرى كما ترون.
    و عرضنا الموضوع على رئيس القسم فقال هذا نوع من الايحاء القوى يستطيعه بعض الناس و مذكور فى الكتب حالات من هذا النوع.
    و كان الموضوع الاخر مع نفس الدكتورة ... اثناء علاجها لطفل عانى من مشاكل نفسية عميقة بسبب مأسى تعرض لها بالرغم من سنه الصغير و كان اهم شئ فى علاجه ان يحكى هذه المآسى لشخص ما ليبدأ هذا الشخص فى علاجه و كان هذا الشخص الذى سيعالج هو نفس الدكتورة المحظوظة و عندما بدأ الطفل يحكى فوجئت بوجه الطفل تظهر فيه التجاعيد و يصبح كشيخ كبير و كان الموقف غاية فى الصعوبة و كادت الدكتورة .... تصاب بانهيار عصبى و كان التفسير فى هذه المرة واضحا... عدوى نفسية.
    قلت بدهشة: عدوى نفسية؟؟؟
    قالت: نعم العدوى النفسية هى نقل الحالة من المريض الى الطبيب او الى اى شخص ملاصق له و تحدث احيانا و هى نوع من التعاطف او التأثر بالحالة.

    فكرت بعد كل هذا الكلام و احسست بالاحباط و بفشل مشروع رؤية الجن و خصوصا بعد عودة محمد الى القاهرة و لكنى لا اميل لليأس فقررت دراسة الموضوع دراسة عملية ساقوم بالمعالجة بالقرأن بنفسى.
    و عندها ساعرف ان كان هذا ايحاء ام حقيقة
    ماذا حدث اثناء محاولتى للعلاج بالقرأن
    و هل استطعت اخراج الجن؟؟
    هذا واكثر سنعرفه فى الحلقات القادمة


    مرت الايام و فكرة العلاج بالقرأن فى بالى و لم تفارقنى بعد انهيار المشروع الذى كنت متحمسا له كثيرا.
    و فى يوم من الايام كنت جالسا مع اثنين من اصدقائى (خالد) و (هانى) و قلت لهم لم لا نجرب الرقية لنرى ان كان احدكم يلبسه جان.
    طبعا (هانى) و (خالد) عجبتهم الفكرة جدا خصوصا انهم يموتوا فى الهزار و فى الحاجات العجيبة.
    و بدأت بهانى و طبعا عملت الخطوات اللى شرحناها قبل كده و مفيش داعى نكررها و قعدت اقرا على هانى و اشخط فى الجن اللى انا مش شايفه لحد ما فقدنا الامل و بدات اشيل الفكرة من دماغى و فجأة...
    افتكرت حاجة مهمة ..هو مفيش عليه اى اثر و لا حركة يبقى ما عليهوش جن و يبقى الحل انى اقله يسجد لو سجد يبقى معليهوش جن, فقلت ((الجسد لو ما عليهوش جن يسجد)) و فوجئت ان هانى فى لحظة كان ساجد.
    فامرته بفتح عينيه و قلت له: انت سجدت ازاى؟؟
    فقال: ماعرفش انا حسيت ركبى اتزقت لقدام و لقيت جسمى بيميل و سجدت لا ارادى.
    انتو عارفين انا اتمنيت للحظة ان الموضوع يكون وهم و انى اقفل البوابة اللى مفتوحة فى دماغى دى و ارتاح لكن سجود هانى اكد موضوع الرقية من تانى.
    لكن كل ده كوم و اللى حصل مع خالد كوم تانى.
    و خالد ده علشان تبقوا عارفين لو مهزرش يموت... ميعرفش يعيش من غير مقالب.
    طبعا ماسابنيش غير لما قريت عليه و غمض الباشا عينه و قرا الفاتحة و بص على القبلة و و قريت انا عليه و قلت: لو فيه جن يرفع الايد اليمين لفوق. و الاقى الباشا رفع ايديه اليمين و الشمال لفوق خالص زى وضع الطيارة كده.
    انا طبعا عارف صاحبى و قلت اكيد بيهزر فصرخت فيه: انت بتستهبل يا خالد؟؟
    فرد على بصوت اقرب الى البكاء: و الله اترفعوا لوحدهم الحقنى.
    رحت متربع على كنبة موجودة جنبى و قعدت ابص لخالد و هو رافع ايديه الاتنين و مغمض عينه و مش عارف اعمل ايه (ماخدنهاش فى الكتاب دى) و كمان خالد ممكن يكون عامل مقلب. و فى الاخر جاتلى فكرة اعرف هو عامل مقلب و لا لأ, هاضربه!!!
    احسن حل انى الطشله فاذا كان عامل مقلب مش هيستحمل لكن اذا كان عليه جن هيسكت و خصوصا هو شكله قرب يعيط من الخوف.
    و قمت لطشتله على وشه و فوجئت ان خالد ساكت و مستكين... يبقى عليه جن فعلا.
    طيب اعمل ايه انا فى الجن اللى بيتطوع و يرفع الايدين الاتنين بدال ايد واحدة ده.
    انا حسيت ان الامور هتعك و قلت لخالد: افتح عنيك و خلاص.
    قال: خلاص ايه انت مش هتطلعه؟؟
    قلتله: و انا مالى انا مبعرفش اطلع.
    قالى: انت بعد ما لبشتنى هاتسيبنى؟ لا لازم تطلعهولى.
    قلت: شوف اى حد يفهم فى الموضوع ده يطلعهولك انا عمرى ما طلعت قبل كده.
    و انتهى الحوار لكن خالد ما سابنيش فى حالى و فضل ورايا و عاوزنى اطلعله الجن و هو فاكر ان عندى قدرات خارقة و انا بصراحة بعد التجربة العملية كنت اكتفيت من الموضوع ده و معنديش اى رغبة فى انى استمر فى سكة ماعرفهاش.
    و بعد شهرين... ايوه شهرين و خالد مش سايبنى اضطريت انى اقرا عليه تانى و كانت الجلسة المرة دى طويلة شوية.
    بدات عادى خالص و انا عملت فيها حركة ذكية. خالد ده كان اشول (اعسر) فانا علشان الجن مايرفعش ايديه الاتنين قلت للجن يرفع ايده الشمال مش اليمين (طبعا ده تأليف منى) و بدأت اامر الجن يطلع و فتحت الشباك علشان يطلع منه (دى قالى عليها محمد) بس المشكلة ان الشباك كان على ايد محمد اليمين ففوجئت بشئ غريب ان خالد بيتنى لقدام و بيلف بطريقة غريبة بحيث ايده الشمال تواجه الشباك و قلت لخالد (زى ما قالى محمد) : لو حسيت بهوا بارد طالع من ايدك يبقى الجن طلع. و لما حسيت ان الجن بيرفع الايد جامد و بيلف ناحية الشباك بدأت اقرا الايات اللى بتعذبه علشان يطلع بسرعة (كان المفروض اصبر عليه) و فجأة ايد خالد نزلت جنبه, فسألته انت حسيت بالهوا؟؟ قال: لا انا حسيت ان ايدى نملت جامد جدا و بعدين نزلت جنبى.
    و بعدين فى خالد ده و حكاياته العجيبة؟ انا محمد ماقليش على كل ده.
    امرت خالد بالسجود فسجد ببساطة شديدة, يعنى الجن طلع.
    و كان لابد اتصل بمحمد, فكلمته و قلتله: انا قريت على واحد بس مافيش هوا طلع من ايده و بعدين ايده نزلت و سجد.
    فقال لى: طيب حس بايه.
    قلتله: ان ايده نملت خالص و بعدين نزلت.
    قال لى: حرقته يا فالح.
    ما الذى حدث لى بعد ذلك؟؟
    و هل انتقم الجن منى؟؟
    كل ذلك و كثر فى الحلقات القادمةو فابقوا معنا.





     
    من مواضيعي في كريزي مان

  • عاوز
  • الاقباط يدعون لمقاطعة الوطنى بعد زيادة عز للغول
  • مميزات iPhone مع الصور
  • طوف وشوف اثار مصر الفرعونية
  • الهاتف المحمول Sony Ericsson Xperia Arc قادم إلى بريطانيا في 21 من شهر مارس
  • الكل يدعيله بالشفاه
  • في مصر.. جيب جراند شيروكي 2011 سيارة ذات قدرات خاصة على الطرق الوعرة
  • شعر خاص لمغروره بكيفى انا هههههههههه جامد والله
  • عاوز ضرب نا ر
  • مدرس يكسر ذراع تلميذ مربض بالسرطان متأثرا بتصريحات ( الوزير )
  • عوده السفاح
    افتراضي

    كانت صدمة لى طبعا!!!
    فعمرى مافترضت ابدا انى اوصل الى هذا الحد, و لكن صدمتى الحقيقة هى فى شعورى, فبدلا من ان اشعر بالخوف شعرت بالقوة (او الغرور... لا اعلم) ربما سبب شعورى هذا هو احساسى بأننى حرقت سبب من اسباب خوف البشر فى كل زمان و مكان, و بالرغم من انى كنت اكثر من قول (لا حول ولا قوة الا بالله العلى العظيم) اثناء الرقية و دى معلمهانيش محمد, بس انا كنت باقولها دايما علشان افكر نفسى انى لا املك من امرى شيئا فما بالك بحرق الجن. هو الله وحده. هو الذى يستطيع ان يدفع عنا الاذى و لكن كل علمى بهذا لم يمنعنى من الاستهتار تماما بعالم الجن (و هذا طبعا شئ فى منتهى الخطورة) و لكن و لله الحمد يوجد فى شخصيتى عيب خطير جدا و لكنه فى هذا الموقف نفعنى تماما, فما هو هذا العيب؟
    انا دائما احب التحدى, و لكنى لا صبر لى على الاطلاق و لا استطيع الاستمرار فى اى مجال لفترة طويلة بل امل بسرعة و خصوصا اذا فقدت التحدى, فاذا نجحت فى مجال تركته سريعا لابحث عن تحدى أخر.
    طبعا فهمتوا انا قصدى ايه؟
    انا وصلت لاخر المطاف و فقدت اهتمامى تماما بعالم الجن, فبعد ما عملت نظرية (و لو انى منفذتهاش) و بعد ما حرقت الجن, هاعوز ايه تانى؟
    كفاية جن بقى.
    و ده من ستر ربنا, لانى لو كملت فى السكة دى و انا باستهتارى ده كان ممكن حصلى حاجة.
    طبعا محمد قال لى: انت كان المفروض انذرته قبل ما تحرقه و لو ما انذرتهوش من حق عشيرته انها تنتقم منك. و قال لى كمان احافظ على قراية التحصينات باستمرار, بس انا طبعا اسبوع واحد و بطلت اقرا اى تحصين. و كان الاستهتار وصل معايا لاخره و قلت الجن هيعمل ايه يعنى؟ ما لو دخل هاطلعه تانى و بعدين اكتشفت ان الجن طلعوا فى غاية الذكاء و كان لهم انتقام غريب (بس مش هاقوله غير لما يجى معاده)
    و بعدت عن عالم الجن لكن عالم الجن ما بعدش منى.
    خالد طبعا بقى يحكى للناس (و مواضيع الجن طبعا مثيرة جدا بالنسبة للشباب) و اتعرف انى حرقت جن و انى ماحصلتش و تهيؤات من النوع ده, كل ده و انا بينى و بين نفسى مش ناوى على رقية تانى خالص.
    لحد ما فى يوم جانى (حسن) و حسن ده زى اخويا بالظبط و هو جارى و اخوه صاحبى و اخويا صاحبه. فطبعا العلاقة بيننا قوية جدا, و كان حسن سمع بالموضوع بتاع خالد و جانى يشكيلى من حكاية عجيبة.
    كان حسن ساعتها فى الثانوية و كان كل يوم و هو رايح المدرسة الصبح بيطلع بالبنطلون نضيف و يوصل للمدرسة و البنطون متشخبط عليه بقلم جاف. و كل يوم الموضوع ده يحصل معاه, و هو فاكر حد من زمايله بيهزر معاه, لدرجة انه مرة راح المدرسة و ممشى معاه اتنين حرس ماشيين وراه علشان يشوفوا مين اللى بيشخبط له على البنطلون و ماشفوش حد و فوجئوا لما وصلوا المدرسة ان البنطلون برضه متشخبط عليه.
    ساعتها عرفوا ان الموضوع فيه حاجة مش مظبوطة.
    طبعا طلب منى اشوف عنده جن و لا لأ, و طبعا مقدرتش ارفض.
    و كان دى اول مرة اشوف فيها اللى حصل ده.
    انا قريت عليه الرقية و ده بدأ يتطوح.
    و بدأ يميل و رجليه تسيب و مش قادر يقف.
    قلتله يرتاح شوية و نكمل, و برضه لما قريت تانى حصله نفس الكلام لحد ما اضطر يقعد على الكرسى و كملت انا قراية لحد ما قال لى مش مستحمل و خلانى بطلت قراية.
    طبعا عليه جن...
    لكن الموضوع شكله جامد و انا مش هاعرف اتصرف معاه.
    الحمد لله حسن كان مش لحوح و ما حاولش يضغط عليا لما قلتله انا مش هاقدر اطلعه.
    بس فيه فى حكاية حسن شئ مهم احب اقوله و اخرج عن سياق القصة علشان الفايدة
    ان حسن بعد ما قريت عليه ما راحش لحد تانى و ما حاولش يطلع الجن.
    و علشان تعرفوا حسن كان بيصلى فى المسجد دايما لكن كان شاب زى كل الشباب بيهزر و يلعب كوتشينة و شطرنج و يسمع اغانى.
    و دى الشخصية المثالية للاذى عن طريق الجن. الملتزم نص نص.
    العاصى ده الجن مش محتاجله فى حاجة, ده كمان يمكن يكون من شياطين الانس.
    و الملتزم ما بيقدرش عليه.
    هو يحب الوسط.
    و الدليل على كده ان زى ما قلتلكم حسن ما راحش لاى حد يطلعله الجن, لكن مرت السنين و حسن التزم كويس جدا و بقى شيخ كمان, و الجن تلاشى من حياته و مبقيش ياثر على اى شئ, خرج بقى مخرجش متفرقش. المهم انه ماقدرش يأذيه تانى.
    ايه اللى حصل لى بعد ما سبت الرقية؟
    و ازاى كنت باستهتر بعالم الجن و السحرة؟
    و ايه كان انتقام الجن الذكى جدا منى؟
    ده اللى هنعرفه فى الحلقات الجاية



     
    من مواضيعي في كريزي مان

  • قصة حب رومانسية حتى النهاية
  • تقرير شامل بالصور حول سيارة Gumpert 2012,على يلاجامعة صور حول سيارة Gumpert 2012,سيارة Gumpert 2012
  • فيسبوك تريد تسريع لغة php
  • القلم السحري اخر ما توصلت اليه التكنولوجيا اليابانية
  • سامسونج تطلق عائلة Series 5 من أجهزة الكمبيوتر المحمولة Ultrabooks
  • وصايا الرسول صلى الله علية وسلم للنساء
  • هل ينجح الغناء في إخراج منير من أحزانه ؟
  • أخيرا صدور التحديث NoDO للهاتف المحمول Venue Pro بنظام ويندوز فون7
  • > سوق «الترك» تحول لمعارض للأثاث الدمياطي
  • اجمل صور لkreen kapoor
  • عوده السفاح
    افتراضي

    بالرغم من توقفى عن الرقية الا انى وصلت الى مرحلة غريبة من الاستهتار بعالم الجن و طبعا ده كان خطأ.... خطأ جدا.
    و انا هضرب بس امثلة للموضوع ده و مش هاحكيه كله علشان ما اطولش على الناس
    الحكاية الاولى : الساحر
    فى يوم من الايام كنت راجع من مشوار و ركبت اتوبيس و اثناء مانا كنت فى الاتوبيس لقيت راجل اعمى بيقوده شخص تانى وركبه الاوتوبيس و قال يا ريت لو تنزلوه المحطة.
    طيب الاوتوبيس مش بيروح المحطة و بعدين ده اعمى فانا قلتله انا هاتمشى معاك للمحطة.. الراجل كان لابس عمة و قفطان زى الازهرية بس كان شكله مش مظبوط خالص و مارتحتلهوش بس شلت الخاطر ده من دماغى و قلت ده اعمى مسكين المهم نزلنا من الاوتوبيس فى اقرب مكان للمحطة و رحنا اتمشينا لهناك ففى الطريق كنا بنتكلم و خصوصا انا كنت مضايق من ان الراجل اللى معاه ما وصلهوش للمحطة و سابه كده فابقوله انت منين يا حاج؟؟ قال لى: انا من المحلة و جاى زيارة لناس هنا. فقلتله: طيب انا مستغرب انت جاى زيارة لناس يروحوا يسيبوك كده لوحدك؟
    قال: مانا اصلى كنت جاى اساعده.
    قلتله: ازاى؟؟
    قال: اصل الراجل عريس جديد و فيه ولاد حرام عملوله عمل. و انا عرفت فجيت اساعده.
    قلتله: طيب بتعالج بالقرأن و لا...
    قال: لا كله بالقرأن طبعا.
    قلتله: خلى بالك علشان السكة دى لو مش واخد بالك ممكن تلاقى فيها حاجات كفر.
    قال: لا واخد بالى كويس ماتخافش.
    قلتله: و طلعت الجن ازاى.
    قال: انا قريت قرأن على ميه و قلتلهم يكبوه فى الحمام علشان العمل كان هناك.
    قلتله: طيب و عرفت ازاى ان العمل فى الحمام؟؟
    ضحك و قال: هو انا فيه جن بيساعدنى بس جن مؤمن.
    فانا ضحكت و نغزته فى كتفه و قلتله: انت حاجة من اتنين يا كافر يا نصاب.. فانا اقولك نصاب احسن.
    ضحك بالرغم من انى باشتمه و كنا وصلنا للمحطة فجبتله كرسى و قعدته و جبتله بيبسى (قبل ما اعرف ان البيبسى فيه خنازير) و قطعت له التذكرة و وصيت عليه ناظر المحطة يركبه قطره و قلتله انا ماشى اى خدمة تانى؟
    قال: كنت عاوز اعرف اسمك علشان اعملك حاجة كويسة.
    ضحكت و قلتله: الله الغنى عن حاجتك يا عم.
    قال: بس قول لى اسمك.
    قلتله: حسام حلمى عمران اى خدمة تانى؟
    قاللى شكرا.
    طبعا هو كان متغاظ لما انا قلتله كافر او نصاب و كان بيقول لى هات اسمك بيهددنى بس انا و لا همنى و قلتله على اسمى و لا حطيته فى بالى.

    الموقف التانى كان ((محسن))... محسن ده راجل صوفى قابلته فى الشغل و انا علشان تعرفوا من اهل السنة. يعنى لازم يحصل صدام خصوصا و هو عاوز يتكلم فى الدين و هو ما صلاش من ست سنين, بس كان صدامنا من نوع لطيف لانى مش من هواة الصدام بس كان هو مصمم يقنعنى, و عمل حاجة عجيبة جدا علشان يقنعنى.
    فى يوم من الايام قعدنا فى نادى شركة السكر نتكلم بالليل و هو كان بيحكى عن بركات الشيخ (...) علشان يقنعنى فقال ايه: انا صحيت من النوم يوم الجمعة لقيت نفسى لابس لبس قسيس و قدامى واقف قسيس تانى و رافع صليب.. فقلتله : اكيد كنت بتحلم. قال: ابدا انا كنت شايفه ظاهر باطن (طبعا انا مفهمتش يعنى ايه ظاهر باطن بس سكتت) و بعدين جماعة زمايلى من اتباع الطريقة جم و اقنعونى نروح للشيخ علشان موضوع الصلاة فرحت معاهم اصلى الجمعة و انا لسة شايف نفسى كده برضه لابس نفس اللبس و قدامى نفس الراجل. و الناس شايفينى عادى لحد مارحنا للشيخ بصلى و قال: فيه مسلمين عاوزين يسلموا تانى, وبصلى تانى و قال مالك كده عامل زى ابونا..
    هو الوحيد اللى شافنى كده.
    طبعا واضح ان محسن كان بيسرح بيا فانا ضحكت و قلتله ربنا يهديك يا ولدى حل عن سمايا.
    و روحت الاستراحة بتاعتى و قبل ما احكى لازم افهمكم استراحتى دى شكلها ايه, انا هاختصر و اقول مبنى مفيش فيه غيرى و انا فى الدور التالت فيه... مفهومة.
    يعنى لو اتقتلت محدش يحس بيك.. طلعت فوق و السفرجى جابلى العشا و روح و قعدت لوحدى فى الاستراحة و جيت انام و غمضت عينى و فجأة...
    شفت (و انا مغمض عينيا) عند السقف كده ناس بتتدبح و دمها بيشر فتحت عينى بسرعة مالقيتش حاجة و كل ما اغمض عينى تحصل نفس الحكاية, ما قلقتش طبعا و قلت فى نفسى اكيد جن دخل الاوضة و نفسه يهزر شوية رحت قريت اية الكرسى ما حصلش حاجة, رحت قريت يس و اول ما بدات فيها حسيت ان حاجة ضغطت على رقبتى من ورا و حسيت زى ما تكون حاجة طقت و بعدين رحت فى سابع نومة. تانى يوم جيت انام فى العصرية حصلت نفس القصة و قريت نفس الكلام رحت نمت. و بس ... نسيت القصة و عشت عادى.
    انا ما خفتش ابدا من اللى فات الخوف كان من اللى جاى.
    قابلنى محسن بعدها بايام و قاللى: اليوم اللى كنت معاك حصل معاك حاجة؟؟
    و الحمد لله ان ربنا ثبتنى علشان اعرف ارد عليه: حاجة زى ايه؟
    فقالى: اصلى جاتلى رؤيا من الشيخ بتاعى انه مش هيخليك تعرف تنام.
    طبعا انا هنا اتصدمت خالص و فهمت ان الباشا ساحر و عاوز يقنعنى انها كرامات بس ما بانش عليا و قلتله: هو كان هيحصل بس انا قريت حاجات فنمت على طول.
    فقال بلهفة: قريت ايه؟؟
    قلتله: لا ده مش شغلك بقى. و بعدين الرؤية يراها الرجل الصالح او ترى له, و انت مش بتصلى من ست سنين, يعنى العلماء اختلفوا انت مسلم و لا لأ اساسا. كمان العلامة دى لو من ربنا مكنتش اقرالها حاجة تروح, صح و لا لأ يا خفيف.
    بص لى بغيظ و قال: انا مش هعرف اغلبك ابدا.
    طبعا بعدها احنا الاتنين اتجنبنا بعض تماما. بس الموضوع ده خلانى اكتشف شئ غريب جدا و علشان افهمهولكم هاضربلكم مثال واضح. الجن بيأذى الانسان بتلات طرق المس و العشق و السحر... اخطرهم السحر, عارفين ليه؟؟ علشان الانسان دخل فى الموضوع. الجن لو حبك او اذيته بدون قصد و عاوز يضرك او حتى لو جاله مزاج يغلس عليك كل ده سهل جدا و تغلبه بسهوله, لكن لو بنى أدم اتدخل فى الموضوع بيخلى الجن ما بيطلعش و و لو بالطبل البلدى. اكتشفت انى مش بخاف من الجن ابدا... لكن الانسان مخيف... مخيف جدا."

    الموقف التالت كان كوميدى اكتر منه مخيف, فى مرة لقيت فى الشغل واحد جاى يكشف و انا عارفه انه بيتعاطى مخدرات فقلتله انت مش عيان انت اللى تاعبك الزفت اللى بتشربه, فقالى: انا بقالى شهر مخدتش اى حاجة خالص علشان باعمل تحصين.
    قلتله: نعم؟؟ تحصين ايه اللى بتعمله انت هتعمل فيها شيخ؟؟
    قال لى:اصلى هاطلع اثار.
    طبعا انا عارفه مهبوش و اكيد حد ضحك عليه, و قلتله و هتطلعها ازاى؟
    قال: هاقرا كذا و كذا من القرأن فالخدم بتوع الايات هيقولولى على مكان الباب بتاع المقبرة.
    بصراحة انا حبيت اهزر معاه فقلتله: لا اللى انت هتقراه غلط و رحت ماسك ورقة وقلم و كتبتله ايات و خلاص (اللى جه فى دماغى) و قلتله هتلاقى نور بيتحرك تمشى وراه لحد البوابة او هتلاقى دخان طالع من حتة و له ريحة حلوة يبقى الحتة دى هى البوابة.
    طبعا الكلام نخشش فى دماغه و مكدبش خبر و جرى و راح عامله و طبعا و لا حياة لمن تنادى و خصوصا انه غالبا المكان اللى بيعمل فيه كده لا فيه مقبرة و لا دياوله بس كل الناس فى نواحى الاقصر مجانين بالموضوع ده و كل واحد بيحلم يلاقى كنز يغير حياته و خصوصا لو كان بيبرشم زى الاخ.
    المهم رجع لى تانى و قالى ملقيتش حاجة و انت لازم تيجى معايا تطلعلى الكنز.
    قلت له: غور من وشى اجى معاك فين هاروح اشتغل حرامى اثار على اخر الزمن.
    قال لى: حرام عليك متسبنيش و هاديك التلت و قعد يتمسكن لحد ما بقيت مش عارف اعمل ايه و فجأة جه فى بالى الشيخ عصام.
    و الشيخ عصام ده شيخ نصاب بيعمل حركتين كده و يرقى الناس و يسترزق و كان بيعمل حاجة ظريفه انه كان يجيب العسل و يكسر عليه برشامة فياجرا و يروح لاى حد مربوط و يقوله انا قريت على العسل ده خده .. فالراجل يصحى و يدعيله.
    المهم انا لما افتكرته قلت فى نفسى و الله فرصة نكمل الهزار و رحت قلت: انا هاشوفلك واحد انا معلمه كويس.
    قال لى: الحقنى بيه يعمر بيتك و اللى انت عاوزه.
    قلت له: لا انت حاسب الشيخ انا ماليش دعوة بالفلوس انا هاعمل كده علشان انت صعبت عليا.
    و رحت باعت للشيخ عصام و هو طبعا كان عارف انى فاقسه فقلتله فيه واحد عاوزك تطلع له كنز.
    قال: انا عمرى ما طلعت.
    قلتله: الموضوع بسيط خالص, هتروح معاهم للمكان اللى عاوزينه و تتربع على الارض وتقرا شوية و تقولهم يقروا هم كمان و تعمل حركتين من حركات النصب بتوعك و بعدين تشاورلهم على اى حتة فى الارض و تقلهم احفروا 12 متر هنا هتلاقوا الباب. لو لقيوا حاجة هيدوك فيها و لو مالقيوش مش هتخسر حاجة.
    طبعا الشيخ راح معاهم مكدبش خبر بس فقسوه و كانت حكاية كوميدية.
    كل اللى فات و مواقف زى كده كنت بتعامل معاها باستهتار شديد و بقول فى نفسى لو جن جالى هاطلعه, بس على مدى طويل الجن كان بينتقم منى بذكاء شديد, لقيت نفسى فى خمول و حركتى بقيت قليله و الذاكرة بدأت تمسح و وزنى بيزيد و كل ده بيحصل ببطء شديد خلانى ما حسيتش باى مشكلة.
    الجن كانوا عارفين انى لو حسيت مش هسكت.
    لحد ما جه يوم بعد زمن طويل و كنت باصلى ركعتين فصليت ب (يس) و (الصافات) و نمت بعدها و صحيت لقيت وشى متخربش خالص.
    قعدت اقول يمكن خربشت نفسى و انا نايم؟؟ بصيت على ضوافرى لقيتها مقصوصة و بعدين لاحظت حاجة غريبة جدا... انى فايق جدا و عقلى مصحصح بطريقة محصلتش معايا من زمن.
    فرحت بسرعة قريت الرقية على نفسى و لقيت جن 3 دقايق بالظبط و كان خارج.
    محطيتش فى بالى لكن لقيت انى كل ما اقرا بالصافات اتخربش بنفس الطريقة.
    فاشتغلت بقى على الجن بالرقية و قريت على ميه و خليتها جنبى و اغسل بيها وشى و اديا كل شوية و كل مرة يطلع الجن فى لحظات بس بيرجع بسرعة و من غير ما احس باى مشكلة.
    و بقى قدامى حل من اتنين يا اما اعمل الرقية كل يوم او كل يومين تلاتة بالكتير
    يا اما اسيبه جوه و خلاص و خصوصا انه مش عامل مشكلة كبيرة
    و على فكرة الموضوع ده موجود لحد دلوقت و ساعات كتير باسيبه علشان مش فاضى للرقية و لما افتكره او بابقى فاضى باطلعه.
    بصراحة كان انتقام ما كنتش اتوقعه
    و طبعا انا مش عارف ده انتقام من اهل الجن اللى حرقته فى الاول و لا الساحر سلطه عليا و لا... و لا... لانى زى ما قلتلكم
    استهترت كتير

    -تمت-



     
    من مواضيعي في كريزي مان

  • مصرع 16 شخصا في حادث تصادم حافلة صغيرة بشاحنة في سوهاج
  • القبض على تاجر المخدرات المثير للرعب فى قرية بالغربية
  • إل جي تطلق هاتفاً ذكياً بالتعاون مع جوجل
  • اكيد بتحبها
  • دينا تحاور الراحلة بديعة مصابني في لقاء مستحيل
  • الاعلان الرسمي عن htc evo 3d
  • حصريا بى انفراد تام لعبه البلياردو الحديثه على كريزى مان وبس حمل ومش هاتخصر حاجه
  • شركة Kingston تعلن عن ذاكرات microSD من المستوى العاشر بسعات أكبر وتبقى صغيرة الحجم
  • شركة Wacom تكشف عن قلم يدعم شاشات بتقنية اللمس المتعدد
  • افرحولى خلعت حجابى
  • احمد بيسو
    افتراضي

    جااااااااامد جدا جدا يا حبي مجهود جامد جدا منك في قسم الرعب


    وانا سعيد جدا جدا بوجودك يا حبي تسلملي يارب

    ربنا يخليك ليا يارب

    صور,انمي,رعب,صور,رسومات,مرعبة,صور,رعب,صور,انمي,كريزي مان ,صورانمي,رعب,صور,رعب,متحركه,صور,مخيفه,انمي,صور صور,انمي,رسمه,مرعبه,صور,انمي,,صور,انميات,رعب,صور,انميات,,صور
    ,رسمات,مرعبه,صور,رعب,متحرك,صور,الانمي منتدى,صور,الانمي,الرعب,صور,جواهر,انمي,صور,رعب,صور,شموع,صور,ر عب,صور
    ,جماجم,رعب,صور,مصاص,الدماء,صور,مرعبة صور,افلام,كرتون,رعب,صور,انمي,صور,,انمي,رعب,جديده2010,2008,20 07,2009,صور,الرعب,الجديده,صور,ريزند,إيفل,صور, منتدى,صور,الانمي,المرعب,صور,جمجمه,صور,جماجم,صور,
    جمجم,صور,صور,رعب,صور,مررررررعبة,صور,مرعبة,حلوة,صور,ايادي, رعب,صورضلام,اليل,رعب,صور,كاسات,مرعبة,صور,الانمي,المخيفه,
    وجيه,مرعب,مرعبه,مرعبة,رسم,رعب,جميل,صور,إنمي,صاعق,صور,السايكل وب,رعب خلفيات,مرعبه,خلفيه,رعب,صور,خلفيات,رعب,صور,الرعب,صور,خلفيه
    المصدر: منتديات كريزى مان [فقط الأعضاء المسجلين يمكنهم رؤية الروابط - التسجيل سهل يتطلب -اسم.باسورد.اميل. فقط. ] -شرح طريقة تسجيل عضوية - شرح طريقة استرجاع باسورد
    ,صور,كرتوني,رعب,صور,بيسو,خلفيه,اخطر,الخلفيات,المرعبة,جديده,ص ور,الرعب,مجموعه, من,الخلفيات,الرعب,تحميل,صور,انمي,رعب,تنزيل,صور,رعب,انمي,صور
    ,مهرجين,رعب,صور,تهبل,مرعبه,انمي,الرعب,صور,عيون,مخيفه,صور,
    اقنعه,مخيفه,صور,الاجرام, صور,الانمي,الجريمه,صور,رعب,متنوعه,صور,انمي,ممنوعه,صور,تنانين ,صور,تنين,رعب,صور,في,خيال,الرعب,صور,ساحرات,صور,سحر,صور,سحره, صور,جن,انمي, قسم,الانمي,المرعب,صور,ممتازه,مرعبة,صور,سفاحينCREZEMAN.COM
    منتدى,القصص,المرعب,والمخيفة,قصه,مخيفة,قصه,رعب,قصص,مرعبة,قصص, خيال,رعب,قصص,منتدى,القصص,المرعبة Stories, scary, stories, horror, the Forum, stories, horror, stories, scary, story




     
    من مواضيعي في كريزي مان

  • تأجيل محاكمة يعقوب فى قضية رشوة لـ 26 يوليو
  • صورة لقاء الخميسي 2012 اجدد صور لقاء الخميسي 2012
  • أنشـــــــــــــودة الأمـــــــــوات
  • الذكري الثانية لشهيد الواجب الوطني الشهيد نقيب ‏محمد أبو شقرة‬
  • "التعليم* ‬العالي":‬* ‬لاتغيير في قواعد قبول طلاب سنة الفراغ* ‬بالجامعات*
  • شيرلين شوبرا في الصورة لها جاذبية جامد جدي
  • معاني الالوان في الاحلام معاني ودلالات الالوان في الحلم
  • صور مظاهرات إسرائيل صور المظاهرات في إسرائيل الشعب يريد اسقاط نتنياهو
  • شبح السرداب
  • تبليغ عن مشاركة بواسطة احمد بيسو
  • إضافة رد

    مواقع النشر (المفضلة)

    الكلمات الدلالية (Tags)
    (قصة , مرعبة , مسلسلة) , خبرات , حقيقية



    جديد مواضيع قسم منتدي الرعب والجن والعفاريت
    الذين يشاهدون محتوى الموضوع الآن : 1 ( الأعضاء 0 والزوار 1)
     
    أدوات الموضوع
    انواع عرض الموضوع

    تعليمات المشاركة
    لا تستطيع إضافة مواضيع جديدة
    تستطيع الرد على المواضيع
    لا تستطيع إرفاق ملفات
    لا تستطيع تعديل مشاركاتك

    BB code is متاحة
    كود [IMG] متاحة
    كود HTML معطلة
    Trackbacks are متاحة
    Pingbacks are متاحة
    Refbacks are معطلة



    الساعة معتمدة بتوقيت جرينتش +2 . الساعة الآن 11:34 PM .


    Powered by vBulletin® Version 3.8.1 Copyright ©2000 - 2019, Jelsoft Enterprises Ltd.
    Content Relevant URLs by vBSEO

    جميع المواضيع والمشاركات المكتوبة تعبر عن وجهة نظر صاحبها ... ولا تعبر بأي شكل من الأشكال عن وجهة نظر إدارة المنتدي

    دردشة كريزي مان اون لاين
    دخول الاعضاء