منتدي الرعب والجن والعفاريت رعب وعفاريت خوف جان عفريت السحر العين ،الحسد رعب بلا حدود وتذكر ان كوابيسك ستتحول الى حقيقة . فن الرعب.اغاني ايمو اغاني ميتال

اشباح مخزن عم سلامة الجزء الأول

قائمة الاعضاء المشار إليهم :

إضافة رد
Mr.Hossam
24 اشباح مخزن عم سلامة الجزء الأول

صحيح انا وليد انسان زى باقى البشر يعنى لسه بدرس فى كلية من اعظم كليات البلد حقوق يعنى تقدروا تقولوا ان نفسى اكون محامى او وكيل نيابه


واهى كلها احلام



المنطقة الى انا ساكن فيها اسمها ناهيا قريبة من الدائرى عندنا مخزن انابيب كبير اوى ادماه ارض فاضية و جمبها مخزن تانى مهجور و مقفول الى انا كنت لسه بسلم على صاحبه دلوقتى مخزن عم سلامه



الحكاية كلها بدات من زمان ايام ما كنت لسه فى ثانوى و كانت جدتى الله يرحمها ديما تقول لى يا وليد يا وليد اوعى تمشى من جمب مخزن عم سلامه

اقول لها ليه يا تيتا تقول لى عشان فيه اشباح

وكانت ماما او بابا للما يسمعوا جدتى و هى بتقول كدة يزعقوا لها و يقولوا لها ما تقوليلوش كدة الواد هيطلع جبان

وفى مرة من المرات نزلت و كنت رايح درس ومعدى من عند مخزن عم سلامه



كان فى صمت اشبه بسكوت المقابر وفى اصوات كانها اصوات ناس بتصرخ من كتر العذاب الى بيتعرضواله

خفت جدا و جريت فضلت اجرى اجرى اجرى اجرى اجرى و ابص ورايا من كتر خوفى من الى بسمعه و فجاة خبط فى حاجة ووقعت



وليد ابنى ضنايا انت كويس ده كان صوت ماما وهى ملهوفة عليا و سمعت صوت راجل خشن اوى جاى من بعيد بيقول انا لقيته واقع فى الشارع تقريبا اغمى عليه او اتخبط فى حاجة وان شاء الله يبقا كويس و ربنا يطمنا عليه وماما بترد عليه و بتقول له شكرا يا عم سلامه تسلم رجليك طب اتفضل اشرب اى حاجة

بيت ناحيته لقيته بيبص لى بصة خبيثة و بيبتسم ابتسامعه معرفتش افسرها لحد دلوقتى

ولحد انهاردة كل ما اسلم على م سلامه او اعدى من ادامه يسلم عليا من غير ما عنيه تيجى فى عنيا و يبصلى نفس البصة و نفس الابتسامه لحد ما اختفى من ادامه



دلوقتى خلاص الوضع اختلف و دخلت الجامعه

روحت كليتى و دخلت من باب الجامعه وانا كلى تفاؤل



وليد وليد

ده صوت ندى زميلتى

ايه يا وليد فينك بقالك يومين ما بتحضرش و احنا داخلين على امتحانات . قولت لها و الله يا ندى كان شوية برد و راحوا لحالهم هو انا فاتنى كتير

قالت لى فات الكتير ما بقى الا القليل يا بطل

دخلت محاضراتى ووانا فى المدرج كانت سلمى قاعده معايا انا و ندى و احمد و مى و مينا

ده الجروب بتاعى الى فى الجامعه

سلمى بقا كانت عاشقة ما وراء الطبيعه و بتموت فى الاشباح لدرجة انها مجننانا بصيت عليها قتها ماسكه رزمة ورق حلوة مكتوب فى عنوانها من فوق بخط كبير و عريض

الاسقاط النجمى

قريت الكلمة و انا مش فاهم اى حاجة خلصت المحاضرة و قررت اسالها ايه ده وبدات سلمى تشرح لى ايه الاسقاط النجمى ده ولقيته رائع جدا

قولت بينى وبين نفسى يعنى انا كدة ينفع اروح اشوف عم سلامة بيعمل ايه فى بيته و فى مخزنه الغريب الى كانت جدتى بتخوفنى منه من غير ما اتحرك من مكانى وانا نايم طب و الله فكرة

روحت سئل سلمى طب انا اعمل الاسقاط النجمى ده ازاى قالت لى ده ليه حاجات كتير بس نصيحة يا وليد بلاش

لقيت ندى داخله فى الحوار و بتقول لى انا معاك يا معلم فى اى حاجة و فعلا يومها بليل لقيت ندى بتتصل بيا بعد ما بحثت على الانتر نت و سالت ازاى اوصل للاسقاط النجمى ده و خدت قرار ندمت عليه بعدين

انى لازم اعرف عم سلامة بيعمل ايه فى المخزن بتاعه و فى شقته



حاولت مرة و اتنين و تلاتة و كل يوم انام على امل انى اشوف نفسى وانا نايم و اتجول فى انحاء المكان عشان اروح بقا لبيت عم سلامة و للاسف كنت بفشل فى كل مرة



لحد ما فى يوم روحت فى النوم من كتر التفكير فى عم سلامة و مخزنه و شقته و فجاة

ببص لقيت نفسى واقف ادام المكتب بتاعى الى بزاكر عليه قولت اكيد نسيت حاجة مهمة و قوت اشوفها بمد ايدى علي المكتب مسكت الهوا بصيت ورايا على السري لقتنى نايم فى هدوء ومغمض عنيا . ايه ده اخيرا انا عملتها وصلت للى كنت عايزه خرجت من باب شقتنا و نزلت ياااااااااه سهل اوى انى اروح اى مكان و فجاة وبدون اى مقدمات لقيت نفسى عند باب شقة عم سلامة

وقفت ادام باب الشقة شوية ومن جوايا خوفت ادخل لانى مش عارف هشوف ايه واديت ضهرى لباب الشقه وببص ادامى فجاة شوفته خارج من شقته ووشه اسود زى الفحم و عنيه بتطلع شرار بص لى بصة بارده كانها طالعه من عين جثه محطوطة فى تلاجة الموتى بقالها ايام فوقت فجأة من الموقف لما حسيت بسكينه بتتغرس فى قلبى وببص على الى كان ماسكها اتفاجئت بيه معقوله انت يا .......؟؟؟!!

قوم يا وليد عشان تلحق محاضراتك

ده صوت ست الحبايب و هى بتقومنى عشان الحق كليتى قولت بينى وبين نفسى انا بموت و مطعون بسكينته معقوله يا عم سلامة تقتلنى

قومت من نومى وانا بقول استغفر الله العظيم اعوذ بالله من الشيطان الرجيم وانا فى قمة رعبى وعلى وشى اشد علامات الفزع

استغفرت ربنا و قومت استعديت للنزول و اتصلت بندى عشان احكى لها على الى وصلت له لقيت تليفونها مقفول

نزلت من البيت و عديت كالعادة من ادام مخزن عم سلامة بس المرة دى عم ملقتش عم سلامة و ما لقتش المخزن وما لقتش اى حاجة غير شارع فاضى

اتخضيت ايه ده هو انا فى مكان تانى ولا ايه

رجعت جرى على البيت عشان افهم ايه الى بيحصل دخلت الشقه عمال انده على امى و على بابا محدش بيرد

دخلت اودتى وببص فجاة عالسرير لقتنى نايم زى منا مغمض عنيا وساعتها عرفت انى لسه ما قومتش اصلا من نومى ولا انا كدة اتحبست فى العالم الى دخلت فيه

فوقت لنفسى لما لقيت والدتى داخلة تصحينى من النوم و انا شايف نفسى بقوم من نومى وببوس ايديها و بقول لها صباح الفل يا ست الكل وشايف نفسى بقوم و ادخل الحمام و باخد شاور و اخرج البس و شايفنى ماسك تليفونى بتصل بندى و بقول تليفونها مقفول ليه !! و شوفتنى وانا نازل الشارع و معدى من ادام مخزن عم سلامة و شوفتنى واقف مستغرب ان مفيش مخزن و شوفتى راجع عالبيت بجرى وفجأة راح كل الى انا بشوفه و شوفت سواد كانى دخلت فى غيبوبة



هو انا كدة اتحبست فى العالم المجهول ده و فى السواد ده ولا انا كدة مت آه مت ادام شوفت نفسى يبقا مت لا ما متش بدليل انى بتكلم اهه

قاطع كل تفكيرى صوت دبور و هو بيقول لى حمد الله عالسلامة يا وليد معلش قدر الله و ماا شاء فعل حادثة بسيطه يا بطل

مين دبور . ده جارى فى البيت الى جمبى و متربى معايا وزى ما بنقول ابن منطقتى

بدات اجمع الاحداث شوية لحد ما لقيت نفسى نايم على سرير مستشفى ودبور موجود على كرسى جمب السرير

قولت له ايه الى حصل لى انا اخر حاجة فاكرها انى كنت ب... قررت ما اكملش كلام لانى هحكى و اقول ايه ماهو اكيد مش هيصدق اسقاط نجمى و عم سلامه و وشه اسود و كان هيموتنى بسكينه لالالا مش هحكى حاجة



قولت له ايه الى حصل يا دبور



قال لى يا ابنى احنا سمعنا صويت فى الشارع و صوت عربية بتجرى نزلنا جرى عالصوت لقيناك واقع على الارض و يا دوب طلبنا الاسعاف و جابتك عالمستشفى سواق منه لله الى خبطك و جرى ده

المهم انك بخير دلوقتى يا صاحبى

قولت له الحمد لله طب فين امى و ابويا

قال لى كانوا هنا و لسة ماشيين من شوية

سرحت شوية فى فكرة ازاى امال الى انا شضوفته ده ايه حلم لا حلم ازاى وانا فعلا نزلت الشارع اهه انا مش فاهم اى حاجة

قررت اريح دماغى و انام يمكن ارتاح

انا نايم اهه وضحكت بصوت عالى بس محدش سمعه لانى تانى لقيت نفسى واقف جمب السرير الى فى المستشفى و شايفنى وانا نايم يارب ارحنى انا خلاص مش عايز اعرف حاجة انا عايز ارتاح بس كان فى حاجة غريبة انا مش فى المستشفى انا فى مكان مقفول وضلمه اوى لدرجة انى مش شايف غير نفسى عالسرير

امال فين دبور و فين المستشفى

سالت السؤال ده لنفسى وبدات اعلى صوتى انا فين انا فين انا فين

لقيت ايد بتتحط على كتفى وبتقول لى انت هنا فى المخزن مش كان نفسك تعرف المخزن و تشوفه نورت مخزنى

مين عم سلامة ايه الى جابنى هنا

انت الى سعيت انك تيجى هنا واديت هنا نورتنى ونورت باقى اخواتك

ببص لقيت النور بدا يوضح و المخزن كله عبارة عن سراير جمب بعض وكل سرير واقف جمبه صاحبه

طب انا عايز افهم انا ايه ميت ولا حى انا ايه

بكل هدوء و بنظرة بارده لدرجة انى اترعبت منها لقيت عم سلامة بيقول لى انت مش ميت ولا حى انت هنا فى العالم بتاعى



وانت صاحي ده بقا العالم الخاص بيك لكن وانت نايم بقيت ملكى بتاعى انا اتحكمم فيك براحتى

قولت بصوت واطى استغر الله العظيم من كل ذنب عظيم وكررتها كذا مرة وقولت اعوذ بكلمات الله التامات من شر ما خلق انت فعلا شيطان زى ما جدتى قالت لى انت مش بنى آدم

اتغيرت ملامح عم سلامة كانه جاى من اعماق الجحيم وصوته اتغير و فجاة لقيت كل الاشخاص الى واقفين جمب السراير قربوا ووقفوا جمبه و قال بصوت غريب

انت ملكى يا وليد ملكى احلامك بقت ملكى نومك بقا ملكى و طول منت نايم انت ملكى انا . انت و كل من يفكر ايه الى جوة مخزنى



صرخت بعلو صوتى صرخة حسيت انى صوتى راح منها

ما فوقنيش منها غير صوت دبور و هو بيقول لى قوم وليد فوق يا وليد استغفر الله العظيم فوق قومت فجاة وانا فى قمة الفزع ايه الى انا شوفته ده حلم ولا كابوس

خرجت من المستشفى بعد فترة وبقيت بخاف حتى اعدى من الشارع الى فيه مخزن عم سلامه و حاولت ارجع لحياتى عادى بس بفشل انا دلوقتى فى اليوم الرابع بدون نوم 4 ايام متواصل مش عايز انام عشان ما اروحلوش تانى عشان ما اروحش مخزن عم سلامة يعنى انا بقيت شبح من الى جدتى كانت بتقول لى عليهم

النوم هيغلبنى وعينى بتقفل غصب عنى هنام خلاص انا رايح رايح المخزن رايح عند عم سلامه



فعلا نمت وشوفت نفسى واقف جمب سريرى وانا نايم وعم سلامه قرب لى و قال لى مش قولت لك مفيش مفر منى

هتفضل جمبى هنا ووقت نومك ملكى



غريبة ان اعداد السراي الى فى المخزن زادت و كترت ايه ده

دى ندى ندى يا ندى ايه الى جابك هنا

ندى ما بتردش عليا مش سمعانى بس واقفه جمب سرير و شايفه نفسها و هى نايمه

جه عم سلامه و قال لى استعد يا بطل دورك

قولت له دورى فى ايه

قال لى دورك ما انت صحيح ما تعرفش

كل الى باخدهم مخزنى بيقوموا بدور مبيقعدوش فى المخزن كدة و خلاص

وانت دورك قوى لانى من زمان متوسم فيك انك مناسب

قولت له مناسب لايه يا عم سلامة

قال لى مناسب لاستحضاره

قلت له هو مين ده الى هستحضره وفين ايه الى بتقوله ده ارجوك ارحمنى

ضحك نفس الضحكه الى معاها صرخات ناس كتير طلعت صرخات ناس بتتعذب

وقال بكل برود هو فى غيره ابليس

كانى اتخبط بلوح تلج على راسى اب بب بب ابليس

انا مش عايز اعيش موتنى و ارحمنى

قال لى اموتك ده انت المطلوب يا وليد

هسيبك تفوق من نومك لكن اعمل حسابك اول متنام تكون مستعد عشان يحضر وصدقنى جايزتك عنده هتكون كبيرة وماتحاولش تهرب بقلة النوم يا وليد يوم اسبوع شهر مسيرك هتنام و تيجى لى هنا هنا فى مخزنى



قومت من نومى وانا عارف انى مكنتش بحلم لا دى حقيقة بس مش عايز انام

انا ببعت الرسالة دى ومينا ساعدنى فى انها توصل لناس كتير ساعدونى وقولوا لى اعمل ايه انا بقالى 6 ايام ما دوقتش طعم النوم وباخد ادوية وبرشام كيميا عشان ما انامش بس بضعف و عينى بتقفل ساعدونى و تعالوا

حتى روحوا افتحوا المخزن هو مش بعيد وما يتوههش عند الدائرى سلم ناهية ادام مخزن الانابيب

هستناكوا تعالوااا وساع.......... انا نمت



الى اللقاء فى الجزء الثانى من اشباح مخزن عم سلامة



ذات صلة:


 
من مواضيعي في كريزي مان

  • قصيدة عن عيد الام بعنوان اليوم يومك
  • نصائح هامة للشباب
  • السلام عليكم
  • هل انت شخصية مغناطيسية؟
  • قلمك سفير اخلاقك
  • اغنية محمود الليثي - بونبوناية من فيلم عيال حريفة تحميل مباشر
  • البوم منوعات - love For Ever حب للأبد Cd Q 320Kpbs
  • قصة حب رومانسية
  • لم تعد حياتي لها طعم
  • سنة جديدة - ادم فتحي 2015 CD Q 320 Kbp
  • إضافة رد

    مواقع النشر (المفضلة)

    الكلمات الدلالية (Tags)
    أحسن , الأول , الجزء , استاد , سلامة , عم



    جديد مواضيع قسم منتدي الرعب والجن والعفاريت
    الذين يشاهدون محتوى الموضوع الآن : 1 ( الأعضاء 0 والزوار 1)
     
    أدوات الموضوع
    انواع عرض الموضوع

    تعليمات المشاركة
    لا تستطيع إضافة مواضيع جديدة
    تستطيع الرد على المواضيع
    لا تستطيع إرفاق ملفات
    لا تستطيع تعديل مشاركاتك

    BB code is متاحة
    كود [IMG] متاحة
    كود HTML معطلة
    Trackbacks are متاحة
    Pingbacks are متاحة
    Refbacks are معطلة



    الساعة معتمدة بتوقيت جرينتش +2 . الساعة الآن 10:35 PM .


    Powered by vBulletin® Version 3.8.1 Copyright ©2000 - 2019, Jelsoft Enterprises Ltd.
    Content Relevant URLs by vBSEO

    جميع المواضيع والمشاركات المكتوبة تعبر عن وجهة نظر صاحبها ... ولا تعبر بأي شكل من الأشكال عن وجهة نظر إدارة المنتدي

    دردشة كريزي مان اون لاين
    دخول الاعضاء