منتدي كريزى مان

منتدي كريزى مان (http://www.crezeman.com/vb/)
-   الشعر والشعراء (http://www.crezeman.com/vb/f29)
-   -   ورود الحلم (http://www.crezeman.com/vb/t306377.html)

homoo000 10-18-2015 06:49 PM

ورود الحلم
 
ورود الحلم ما بتدبلش
يشوف بعيونه ناس ياما
و روحه تعصى و ما تقبلش
يحاول يبقى مش هو
فيغرق فى الحياة و يدوب
و يرضى ... و نفسه من جوا
تعانده ... و تمشى بالمقلوب
يزود بعده عن حلمه
تقرب روحه و تعافر
يعود للدنيا و الزحمه
خياله يسيبه و يسافر
و فجأة تمطر الدنيا
مطر يشبه لاحلامه
فتضحك روحه من جوا
و تانى يحب ايامه
و من غير اذن تتبدل
حاجات ف عنيه فيعشقها
و يسمع ثومة من تانى
يلاقى نفسه صدقها

فترجع به سنين عمره
يحس الحلم بيقرب
يبات يقراه .. و يحكى معاه
حاجات جواه بتتسرب
و تيجى حروفها فتضمه
يغيب فيها و ينسى الكون
تمد ايديها على روحه
تلملم بين ضلوعه الكون
تقابله ... يولد تانى
ولد عاشق بيتعلم
بتشبه كل تفاصيله
بدون حتى ما تتكلم
يتوه ميت توهة فى اللحظة
من السحر اللى جواها
فيحلف انها هى
مفيش ولا حاجة نقصاها
ويتلاقو ف ضل الشوق
ينام الحلم جواهم
انا عاشق ... و انا عاشقة
هنا .... و الدنيا تنساهم

*لينا* 10-19-2015 03:22 AM

رد: ورود الحلم
 
احسنت بجد كلمات جميله جدا
راقت لى تسلم ايدك
دومت متميز

اضمك حبيبى 01-13-2016 10:54 PM

رد: ورود الحلم
 
تمنــــى لكـ من القلب .. إبداعـــاً يصل بكـ إلى النجـــوم ..

سطرت لنا أجمل معانى الحب

بتلك الردود الشيقة التي تأخذنا

إلى أعماق البحار دون خوف

بل بلذة غريبة ورائعة

دمت لنا ودام قلمك


الساعة معتمدة بتوقيت جرينتش +2 . الساعة الآن 04:13 AM .

Powered by vBulletin® Version 3.8.1 Copyright ©2000 - 2019, Jelsoft Enterprises Ltd.
Content Relevant URLs by vBSEO
User Alert System provided by Advanced User Tagging (Lite) - vBulletin Mods & Addons Copyright © 2019 DragonByte Technologies Ltd.

a.d - i.s.s.w